Համակարգչային գիտություն
Ծնվել եմ 1993 թ. Երևանում: Մինչև 2003 թ. ապրել եմ Արարատի մարզի Մասիս գյուղում և հաճախել եմ տեղի միջնակարգ դպրոցը: Գյուղում ապրած տարիները շատ կարևոր դեր են խաղացել իմ կյանքում, քանի որ հնարավորություն եմ ունեցել անմիջականորեն շփվելու բնության հետ: 2003 թ. ես և եղբայրս ընդունվեցինք “Քվանտ” վարժարան, և մենք ընտանիքով տեղափոխվեցինք Երևան:
“Քվանտ” վարժարանը նոր էջ բացեց իմ կյանքում, և ես գիտակցեցի կրթության նկատմամբ իմ սերը: Այնտեղ սովորելու տարիներին ստացա հիմնավոր կրթություն բոլոր առարկաներից, սակայն հասկացա, որ ինձ գրավում են բնական գիտությունները: Յոթերորդ դասարանում “Քվանտ” վարժարանի կազմակերպած օժտվածների մրցույթում հաղթանակն ինձ հնարավորություն տվեց անվճար սովորելու վարժարանում, ինչպես նաև ներգրավեց ինձ օլիմպիական շարժման մեջ: Ուսման հետագա տարիներին մասնակցել եմ հանրապետական օլիմպիադաների մաթեմատիկա, ինֆորմատիկա, ֆիզիկա և աստղագիտություն առարկաներից և արժանացել եմ մրցանակների բոլոր մրցույթներում: Մասնավորապես արժանացել եմ 4 առաջին, 4 երկրորդ և 3 երրորդ կարգի դիպլոմների: Նշեմ նաև դպրոցական տարիների մի քանի հաջողություններ2005-2010 թթ. հաճախել եմ Ավետ Տերտերյանի անվան երաժշտական դպրոցի ֆլեյտայի դասարան: 2010 թ. դարձել եմ առաջին կարգի դափնեկիր Գյումրիում կայացած երաժիշտ կատարողների “Վերածնունդ” միջազգային մրցույթ-փառատոնում: Մասնակցել եմ նաև Երևան քաղաքի երաժշտական փառատոնին և արժանացել եմ պատվոգրի: Իմ կյանքում շատ եմ կարևորում երաժշտական կրթությունը, քանի որ այն մեծապես նպաստել է իմ անհատականության զարգացմանը:
2012 թ. սեպտեմբերից սովորում եմ Մասաչուսեթսի տեխնոլոգիայի ինստիտուտում` համակարգչային գիտության ոլորտում (computer science): 2013 թ. սկզբից աշխատում եմ համալսարանի համակարգչային գիտության և արհեստական բանականության լաբորատորիայում: 2013 թ. ամռանն աշխատելու եմ «Google» ընկերությունում` որպես ծրագրավորող:
Ունեմ շատ նախասիրություններ: Հայաստանում եղած ժամանակ շուրջ երեք տարի հաճախել եմ Հայաստանի պետական ֆիլհարմոնիկ նվագախմբի գրեթե բոլոր համերգներին: Փորձում եմ ժամանակ գտնել և հաճախել Բոստոնի սիմֆոնիկ նվագախմբի համերգներին ևս: Զբաղվում եմ մի քանի սպորտաձևերով` լեռնադահուկային սպորտ, վազք, մեծ և փոքր թենիս, հեծանիվ: Շատ եմ սիրում արշավել լեռներում (մանավանդ` Հայաստանի լեռներում): Այս նախասիրություններն օգնում են միշտ թարմ մնալ ծանրաբեռնված առօրյայի պայմաններում:
Մշակույթ և տեխնոլոգիա
Ֆինանսներ
Մաթեմատիկա