Ծնած եմ 1994ին, ԱՄՆ, Քալիֆորնիա նահանգի Ուիթիըր քաղաքի մէջ։ Անդրանիկ զաւակն եմ Ամերիկա ծնած հայ ծնողներու։ Երկու տարեկանէս սկսած եմ յաճախել տեղւոյն Մեսրոպեան Ազգային Վարժարանը, որմէ շրջանաւարտ դարձայ 2012 թուականին: Մեսրոպեանը աւարտելէս ետք, բարձրագոյն ուսումս շարունակեցի UCLA համալսարանէն ներս: Յունիս 2016-ին՝ UCLAը աւարտեցի Անգլերէն գրականութեան եւ պատմագիտութեան պսակաւոր արուեստի զոյգ վկայականներով, ստանալով բարձրագոյն գնահատականներ (summa cum laude), նաեւ Ուիլիըմ Սարոյեանի մասին իմ աւարտաճառս արժանացաւ պատուոյ բարձրագոյն գնահատանքի։ 2017-ի աշնան պիտի սկսիմ մագիստրոսի վկայականիս դասընթացքները Շիքակոյի Համալսարանէն (University of Chicago) ներս, մասնագիտանալով Արեւելագիտութեան մէջ։

Համալսարանական չորս տարիներուս ընթացքին, UCLAէն ներս, գործօն դեր ունեցած եմ Հայ Ուսանողական Միութեան մէջ եւ որպէս յանձնախումբի անդամ ծառայած եմ միութեան սահմանդրութիւնն ու օրէնքները բարեփոխելու աշխատանքներուն: Ապա երկու տարի որպէս փոխ պատասխանատու աշխատած եմ համալսարանին հայկական եւ պարսկական գիրքերը համադրելու ծրագիրին մէջ, միաժամանակ նաեւ երեք տարի թղթակից եղած եմ համալսարանիս պաշտօնաթերթին (The Daily Bruin): Ապա պաշտօնաթերթին խմբագրական կազմին անդամ եղած եմ երկու տարի․ այդ ժամանակ, Daily Bruin-ը ընտրուեցաւ որպէս ԱՄՆի տարածքին, լաւագոյն համալսարանական թերթը Associated Collegiate Press-ի կողմէ։ Համալսարանական վերջին տարուան ընթացքին, իմ հեղինակած յօդուածներէս մէկը արժանացաւ առաջին մրցանակին՝ ամբողջ Քալիֆորնիոյ տարածքին համալսարանական թերթերուն մէջ լոյս տեսած իբրեւ լաւագոյն յօդուած, California College Media Association-ի կողմէ։ Daily Bruin-ին մէջ տպուելէն բացի, յօդուածներս լոյս տեսած են նաև New York Times և Armenian Weekly թերթերուն մէջ։

2017ի սկիզբէն կը պաշնօնավարեմ Հայ Բարեգործական Ընդհանուր Միութեան Վաչէ և Թամար Մանուկեան Երկրորդական Վարժարանէն ներս որպէս ընկերային գիտութեանց ուսուցիչ։ Ուսումս կ՛ուզեմ շարունակել ուսումնասիրելով հայերու իրավիճակը քսաներորդ դարու Թուրքիոյ հանրապետութեան մէջ, որպէսզի լոյսի տակ առնենք հայոց պատմութեան այդ կարեւոր ժամանակաշրջանը իր զանազան երեւոյթներով։